Oarsoaldeko Hitza

2009-07-02 | 10:59:15

12 orduko zuzeneko saioarekin ospatuko du 10. urteurrena Oiartzun Irratiak

Uztailaren 7an, Doneztebe plazan egingo dute saioa gonbidatu bereziekin

Hamabi orduko zuzeneko saioarekin ospatuko du 10. urteurrena Oiartzun Irratiak, datorren asteartean, hilak 7. 1999ko uztailaren 7an emititu zuen lehenengo aldiz herriko irratiak. Egun hura gogoan, Doneztebe plazatik emitituko dute saio berezia. Urtzi Argibaik, Uxue Perezek eta Vanessa Ziaurritzek zuzenduko dute, baina kolaboratzaile bereziak izango dituzte: Gemma Lasarte, Ane Lardi, Arkaitz Goikoetxea, Arozena anaiak, Joxe Migel Lopez, Arantxi Iragorri, Eñaut Gantxegi, Miren Etxenike... Baita herriko talde eta elkarteetako ordezkariak ere. Hau "hasiera" baino ez dela ere jakinarazi dute irratikideek: irailetik aurrera bestelako ekimenak egingo dituzte urtemuga ospatzeko: mahai-inguruak, antzerkiak...

Ez du erantzunik

2009-06-30 | 12:51:52

OKEko Haur Mailako neskek Donosti Cupen jokatuko dute

Datorren astelehenetik ostegunera jokatuko dute txapelketa

OKEko Haur Mailako neskek Donosti Cupen jokatuko dute. Azken bi asteetan entrenamendu saio bereziak egiten ari dira Ugaldetxon. Datorren astelehenetik ostegunera lau partida jokatuko dituzte G-14 mailan, ligaxka moduan. Horietako bi, etxean jokatuko dituzte. Kontrarioen artean, AEBtako eta Erresuma Batuko taldeak izango dituzte. Titay Calvo eta Vero Escribano entrenatzaileek taldeak "zerbait lortu" dezakeela uste dute, "jokalari onak direlako eta taldean oso ongi moldatzen direlako".

Ez du erantzunik

2009-06-29 | 12:17:02

Ugaldetxoko futbol zelaiek Karla Lekuona izena izango dute aurrerantzean

Atzo OKE Eguna ospatu zuen elkarteak

Ugaldetxoko futbol zelaiak, OKEk erabiltzen dituenak, Karla Lekuona izena izango dute aurrerantzean. Hala jakinarazi zuen atzo Aitor Etxeberria alkateak, OKE Egunaren baitan Lekuonari egindako omenaldian. 35 urtean elkartean egindako lana eskertu zioten iaz zendutako zuzendaritzako kide ohiari. 500 lagun inguru bildu ziren bazkaltzeko bakarrik, eta egun guztian zehar, are jende gehiago hurbildu zen OKE Egunera. Nazional Mailako eta Lehen Erregionaleko jokalariek opari bana jaso zuten "egindako denboraldi ezin hobeagatik". Horrez gain, Gaizka Saizarrek eta Unai Albak oparitutako kamisetak jaso zituzten Alaia Campo eta Alazne Inziarte jokalariek, denboraldi honetan lesio larriak izan dituztelako. FC Bartzelonako talde nagusiak sinatutako kamiseta ere oparitu zioten Gorka Azpeitia jokalariari. Azkenik, Lekuonaren senideek Realeko kamiseta jaso zuten opari gisa. Talde bakoitzean denboraldian nabarmendu diren bi jokalariek ere aipamenak jaso zituzten bazkalondorenean.

Ez du erantzunik

2009-06-26 | 11:47:42

Euskal Herriko Trialsin Txapelketa etzi hasiko da, Arditurrin

Iker Gonzalez errenteriarrak eta Ibai Laboa sanjuandarrak parte hartuko dute

Euskal Herriko Trialsin Txapelketa etzi hasiko da, Arditurriko meategietan. 10:30etik 13:30era izango da proba erreka bazterrean. Maila ezberdinetako kirolariek parte hartuko dute, bakoitzak bere neurriko zailtasunari aurre egin beharko diolarik. Besteak beste, Iker Gonzalez errenteriarrak eta Ibai Laboa sanjuandarrak ere parte hartuko dute. Ikusleei Arditurriko meategientzako prestatutako aparkalekuan autoak uzteko aholkua luzatu diete.

Ez du erantzunik

2009-06-25 | 11:54:28

Edurne Agirrezabalak 'Izarren argia' filman parte hartuko du

Mikel Ruedaren filma aste honetan hasi dira grabatzen

Edurne Agirrezabalak 'Izarren argia' filman parte hartuko du. Mikel Rueda zuzendari bilbotarrak 36ko Gerraren ondorioz Saturrarango kartzelan egon ziren 4.000 emakumeen historia kontatuko du. Aste honetan hasi dira grabaketak Azpeitian. Guztira, sei astean grabatuko dute filma Azpeitian, Hondarribian eta Artikutzan, bi milioi euroko aurrekontuarekin. Barbara Goenaga hondarribiarra da filmaren protagonista. Agirrezabalak Klara Badiola, Itziar Lazkano, Sara Cozar, Itziar Ituño, Garbiñe Insausti edota Esti Gabilondo izango ditu lankide.

Ez du erantzunik

2009-06-23 | 10:25:35

Eneko Salaberriaren kartelak iragarriko ditu xanistebanak

Aurretik bi aldiz saria jaso izan du

Eneko Salaberriaren kartelak iragarriko ditu aurtengo xanistebanak. Aurretik ere, beste bi aldiz irabazi izan du saria -azkenekoz, 2007an-. Atzo aukeratu zuten kartel irabazi Kultura zinegotziak, Jai Batzordeko kideek eta pintura munduko herriko adituek. Aurten, beste urteetan baino kartel gutxiago aurkeztu dituzte lehiaketara. Bigarren saria, Angel Blanco errenteriarrak irabazi du.

Ez du erantzunik

2009-06-22 | 10:50:23

OKEk Elkartearen Egunean Karla Lekuona omenduko du

Denboraldian gehien nabarmendutako jokalariak ere zorionduko dituzte

Datorren igandean, hilak 28, OKEk Elkartearen Eguna ospatuko du. Aurtengo eguna Karla Lekuona zuzendaritzako kide izandakoari omenaldi gisa egingo dute. Lekuona iaz hil zen, gaixotasun baten ondorioz. Egunean zehar, futbol partidak, bazkaria, dantzaldia... izango dira Ugaldetxoko futbol zelaiaren inguruetan. Horrez gain, denboraldi honetan talde bakoitzean gehien nabarmendu diren jokalariak ere zorionduko dituzte. 12:00etan izango da ekitaldia nagusia.

Erantzun 1

2009-06-20 | 13:34:36

Mendiburu kalean beilatokia jartzearen kontra daude bizilagunak

Sinadura bilketa egingo dute

Enpresa pribatu batek Mendiburu kaleko lokal batean beilatokia jarri nahi du, eta kaleko bizilagunek sinadura bilketa hasiko dute horren kontra. Bizilagunek esan dutenez, "beilatokia beharrezkoa da, baina leku eroso eta diskretu batean". Mendiburu kalean beilatokia jartzea "plazaren erdian jartzea" dela uste dute. "Ez legoke intimitaterik, negozioei kalte egingo lioke, kalean autoak toki asko kenduko luke...", esan dute bizilagunek. Herrian barrena, beilatokiaren kontrako argudioak azaltzen dituen orriak itsatsi dituzte, eta atzotik, udaletxeko balkoitik ere pankarta zintzilikatu dute, beilatokiaren kontra.

Ez du erantzunik