Oarsoaldeko Hitza

Errenteriako Musika Kultur Elkartea da uztaileko ON aldizkariko protagonista nagusienetakoa, elkarteak berak 60 urte bete baititu aurten; aldizkaria egunotan iritsiko da harpidedunen etxeetara.

Musika eginez eta gozatuz

iban iza

Zentenarioa kanta etengabe eta nonahi entzun daiteke egun hauetan Errenteria-Oreretan, herria madalenetan bete-betean murgilduta dagoen honetan. Denak dantzan jartzen dituen ereserkia da: haurrak, adinekoak, gaupasazaleak, erraldoiak... Baina Zentenarioa herriko musika bandak interpretatuz gero, Zentenarioa herriko musika bandaren eskutik entzunez gero, une hori hunkigarria da askorentzat.

Eta Errenteriako Musika Kultur Elkartea da, hain zuzen, hil honetako ON aldizkariko protagonista nagusienetakoa. Izan ere, aipaturiko elkarteak 60. urte bete ditu aurten. Hala, erreportaje sakon batean, elkartearen nondik norakoa kontatzen da eskualdeko hilabetekarian: elkartea sortu aurreko musika bandak Errenteria-Oreretan, Errenteriako Musika Kultur Elkartearen bilakaera 60 urte hauetan... Eta guztia, noski, protagonistei hitza emanez: elkarteko lehendakaria, musika bandako partaiderik gazteena eta beteranoena...

Lola Lopez makillatzailea

Musikarekin jarraituta, kontzertuetarako urtarorik aproposenetakoa da uda. Horregatik, kontzertu askotako argazkiak ikus ahal izango dira hil honetako ONen, Klik atalean. Kepa Garro antxotarrak kontzertuetan ateratako argazkiak dira. Eta ederrak bezain indartsuak guztiak.

Uztaileko ONek, halaber, Lola Lopez makillatzaile sanpedrotarrari egindako elkarrizketa dakar. Lopezek Goya saria jaso du aurten, El Orfanato film arrakastatsuan egindako lanarengatik.

Horrez gain, bestelako gaiez beteta dator aldizkaria: iritziak, denbora-pasak, Jose Luis Erkizia Baserri Larrugorritan atalean...

Egunotan banatuko da aldizkaria harpidedunen postontzietara; ohi baino azkarrago, OARSOALDEKO HITZAko langileek oporrak hartuko dituztelako aste honetan. Etxean jasotzeko: 943 304 346.